Sa skwelahan, anad nako nga maagi-agian
kanang magsandig lang sa kilid 
o magtambay sa lingkuranan

Kung naa'y kalihokan, 
ako na ang tigpakpak, tigpicture 
or tigkatawa
Wa ko mangandoy nga ang mga mata naa sa akoa 

Apan sukad atong nakita tika, alas singko sa hapon
kalit ko nahulog, naglaom nga naa ko'y ikapahambog,
nga unta ako to ang naghatag og speech o nidawat sa trophy 
o ang top one sa among klase


Niingon ko nga anad nako nga tig-pakpak
Nga di nako pangandoy ang pasidunggan,
kay wa man pud koy talent nga katingalahan

Pero pagka-ugma, nagkasugat napud ta,
ganahan na nuon ko mag-artista
sa tanang magpatagad sa akong atubangan
Imong paglingi ra gyud akong atngan


Andam ko mukilaw og kalayo,
mulakaw ibabaw sa lansang o hilo,
bisan pa og mahimong kataw-anan,
akong presensya imo lang mamatikdan


Dili lalim magsige ra'g damgo
Huwat lang, taga-i ko og panahon
nga makaduol nimu

Kay sukad nakaila tika, 
ganahan ko maningkamot
nga mapadungog sa imo kining mga paghut sa uyamot

Saksi ang ngitngit nga langit sa akong pagbilar
mahuman lang ning balak - mapraktis ug maplastar


Anad naman pud ko mudawat og 'dili'
pero kung gane muduol ka nga nag-ngisi,
adlaw-adlaw ko magsaulog
sa ganti nga pinaagi sa imong pagtando


Kay sukad nakaila tika, magpaabot ko kung alas syete na
Aron suwayan og litok ang mga pulong nga gipugong-pugong,
apil ang mga ambisyon sa atong kaugmaon nga gipapilit sa  bungbong

Kung higugmaon mo gane ako,
ampingan ko ni nga milagro 
kay ang sama nako nga walay dungog 
gidungog sa maluloy-on nga Ginoo,

Panggaon tika nga naa'y paglihok, pag-atiman ug pangandoy

Wa ko masayud unsa nang orasa, 
pero ang gitinguha sukad niadtong hapon sa milabayng mga gahapon
ikaw ug ikaw ra gihapon